युद्धे नाशमुपैति जीवनमिदं हानिस्तु नित्यं मतं
लोकानां खलु जायते क्षतिमहत्पूर्तिं न कर्तुं क्षम:।
सर्वत्र प्रसृता भवेद्धि सततं हा हा ध्वनिर्नित्यशस्
तस्माद्वच्मि विचार्य एव मनसा युद्धं न शान्तिप्रदम्।१।
स्तोकेनैव सुलाभभावसुधिया राष्ट्रोन्नतिं काङ्क्षता
राष्ट्राणां खलु वर्धते भुवि महद्वैरस्य भावोऽधिक:।
स्वार्थांधो मनुजस्तनोति गरलं सर्वत्र गृद्ध्रन्मुहुस्
तस्माद्वच्मि विचार्य एव मनसा युद्धं न शान्तिप्रदम्।२।
देशो नाशमुपैति गच्छति मुहुर्मृत्योर्मुखं प्रत्यहम्
शस्त्राणां बहुगर्जनेन सकला भीता जना भूूरिशः।
युद्धेन प्रतिवासरं प्रतिपलं संजायते दूषितम्
तस्माद्वच्मि विचार्य एव मनसा युद्धं न शान्तिप्रदम्।३।
शान्ति:स्यात्सुखदा प्रसारितकरा लोकोन्मुखा भूतिदा
शस्त्रास्त्रैःजगतो भवेन्न हननं लोको भयाद्वर्जितः।
जीव:स्वास्थ्यमुपेत्य स्वस्थमनसा सम्यग्लसेज्जीवनं
तस्माद्वच्मि विचार्य एव मनसा युद्धं न शान्तिप्रदम्।४।
माता रोदिति पुत्रको मम गत:पुत्र:कवचिद्वै तथा
भार्या रोदिति सौभगं मम गतं भ्राता हृतो वै कथम्।
एवं रोदिति सर्वथैव भगिनी नूनं कुटुम्बस्तथा
तस्माद्वच्मि विचार्य एव मनसा युद्धं न शान्तिप्रदम्।५।
युद्धे कोपि हतो भवेद्भवति वै हानिर्मनुष्यस्य हि
युद्धेनप्रतिवासरं भवति वै सर्वत्र हानिःपरा।
युद्धं नास्ति विकल्पमस्य जगतःशान्त्यैव भद्रं सदा
तस्माद्वच्मि विचार्य एव मनसा युद्धं न शान्तिप्रदम्।६।
तुच्छस्वार्थधिया व्रजन्ति सततं सक्ता जना:सर्वतो
वाग्युद्धेन समारभन्ति चरितं शस्त्रांततां याति यत्।
नानाशस्त्रविताननेन सुजना लोका: क्षयं यान्ति वै
तस्माद्वच्मि विचार्य एव मनसा युद्धं न शान्तिप्रदम्।७।
मान्या वै शृणुत प्रबुद्धसुजना: कालोऽह्ययं केवलं
दूरादेव करं प्रगृह्य बलवान् भुङ्क्ते समन्ताज्जगत्।
लोकोऽयं क्षणभङ्गुर:प्रतिपलं सिक्तासमं संस्खलन्
तस्माद्वच्मि विचार्य एव मनसा युद्धं न शान्तिप्रदम्।८।
युद्धेनाद्य समे भवन्ति विकला देशा धरायां स्थिताः
सर्वत्रेन्धनमार्गमस्ति पिहितं पोता: समुद्रङ्गता:।
सर्वे मार्गमवेक्षयन्ति चकिता मार्गोवरुद्धस्तथा
तस्माद्वच्मि विचार्य एव मनसा युद्धं न शान्तिप्रदम्।९।
कोऽप्यस्तिप्रमुखं प्रवक्ति भव हे संचालितो मेऽनुगः
कोऽप्यस्ति प्रखरं करोति सजवं त्वण्वस्त्र संधानकम्।
यावल्लोकविलोकयेद्भवति वै देशो हतस्त्वस्त्रतस्
तस्माद्वच्मि विचार्य एव मनसा युद्धं न शान्तिप्रदम्।१०।
लोकःशान्तिमुपैतु गच्छ्तु परं भद्रं शुभं वाञ्छतः
शुभ्रं वाक्प्रददातु राष्ट्रसकल:शस्त्रास्त्रमाकुञ्चयन्।
युद्धेनास्ति गतिर्मति:सुविमला सञ्जायतां वै नृणां
तस्माद्वच्मि विचार्य एव मनसा युद्धं न शान्तिप्रदम्।११।
कोई टिप्पणी नहीं:
एक टिप्पणी भेजें