विज्ञानं सविमर्षकं वितनुते काव्यं सदा धीमता-
मानन्दं तनुते धियो वितनुते कल्लोलिनीसंगमः।
नानाकाव्यरसं तनोति सुखदश्चित्तप्रसादो वर
श्चेतस्तापमपाकरोतु सततं कल्लोलिनीयं सताम्।१।
काव्येन प्रसरन्ति कीर्तिविमला:काव्यं चमत्कारकं
काव्यं मानवतां तनोति विमलां बुद्धिं विधत्ते स्थिराम्।
आनन्दस्य महोत्सवो जगति वै जायेत शीघ्रं ध्रुवं चेतस्तापमपाकरोतु सततं कल्लोलिनी धीमताम् ।२।
सानन्दं सुधियो वदन्ति कवितां गायन्ति सद्धर्षिता:
हृल्लेखा:सततं स्फ़ुरन्ति जगतः काव्यं चमत्कारकम्।
कालो याति विपश्चितां प्रतिपलं शास्त्रान्तरं पश्यताञ्
चेतस्तापमपाकरोतु सततं कल्लोलिनीयं सताम्।३।
एकस्मिन्पटले भवन्ति बहुशो विद्वज्जना योजिता
भारत्या:समुपासका नव नवोन्मेषप्रभा भूषिता:।
आत्मानन्दविधायिनी सुकविता भागीरथी शान्तिदा चेतस्तापमपा करोतु सततं कल्लोलिनीयं सताम् ।४।
नैके सिद्धसुहस्तका:सुकवयः काव्ये कृतास्तूद्यमा
लालित्येन समन्वितां सुकवितां नानाविधां कीर्तिदाम्।
गायन्त:प्रभवन्ति यत्र कवयस्त्वाभाषिके पाटले
चेतस्तापमपाकरोतु सततं कल्लोलिनी धीमताम्।५।
डॉ०अवनीशधरद्विवेदी
०८/०५/२०२६
कोई टिप्पणी नहीं:
एक टिप्पणी भेजें